نصائح لتطوير لغتك الإنجليزية أسرع !

بأقدم لك أهم وأفضل النصائح يلي ممكن تساعدك بشكل كبير جداً على تطوير لغتك الإنجليزية اذا اخذتها بعين الإعتبار واستمريت عليها واشتغلت على نفسك!

1. الصبر ثم الصبر، حط في بالك إنه تطوير اللغة الإنجليزية يحتاج منك جهد ويحتاج وقت وماراح يجي التطوير بيوم وليلة عشان كذا اصبر شوي ولا تستعجل!

2. حدد لنفسك هدف ووقت وحاول انك تمشي عليه !

مثلاً : بأعطي نفسي سنة كاملة لتطوير لغتي الإنجليزية من بداية 2024 الى نهايتها وحتشوف الفرق قد ايش كبير إذا إلتزمت !

3. الممارسة والإستمراية : عشان تصير بلبل باللغة الإنجليزية لا بد من إنك تمارس اللغة بشكل مستمر.

4. حط خطة تناسبك يومية أو إسبوعية وإلتزم فيها قدر الإمكان وكل إسبوع قيَم نفسك بكمية المعلومات يلي إكتسبتها وكانت إضافة جميلة لك?!

5. أنا أقولك من الان بيكون عندك أخطاء! لكن لا تخجل من هذا الشي أبداً، ولازم تعرف إنه الأخطاء جزء من التعلم، وماراح تتعلم بدون أخطاء .. إختبر نفسك بشكل دوري وصحح أخطائك قد ما تقدر !

6. خصص لك دفتر دوّن عليه أهم المعلومات يلي تعلمتها، حتقدر ترجع لها بالوقت يلي تحب وبنفس الوقت تكون طورت مهارة الكتابة بالتدوين المُستمر.

7. لما تحس إنه مستواك في اللغة الإنجليزية تحسّن حاول إنك تبعد شوية عن الترجمة عشان تصير الجمل تلقائية في بالك وعلى لسانك وما تحتاج تقلب كل كلمة عربية تفكر فيها للغة الإنجليزية?.

8. كل ما اشتغلت على نفسك أكثر وتطور مستواك، كل ماصارت عملية التعلم أسهل عليك، وكلنا عارفين إنه البداية تكون ثقيلة شوية لكن لا تستسلم أبداً! وانطلق.

9. حاول دائماً إنك تراجع معلوماتك عشان ترسخ في بالك !

10. اعتمد على ممارسة المهارات الأربعة الأساسية لتعلم اللغة الإنجليزية : ( الإستماع - التحدث - القراءة - الكتابة ).

11. اذا حسيت بإحباط او حسيت إنه ما فيه أحد بيشجعك، أنا اقولك لا تُحبط! استريح شوي وبعدها شجع نفسك بنفسك، شعور الإنجاز يلي بيجيك بعدين راح يكون عظيم صدقني لأنك بتكون جنيت ورود التعلم يلي زرعتها وبيكون بُستانك مُبهر.

ملاحظة : إذا حسيت إنك مو قادر تمشي بدون ما أحد يشجعك ويكون معاك، انا معاك وموجودة عشانك وراح أوجهك دائماً بالشي يلي أقدر عليه إذا احتجتني?!

12. لا تُجهد نفسك نهائياً ! كل ما حسيت إنك مو مركز أو إنك مليت أعطي نفسك وقت للراحة عشان ترجع بحماس أكبر!

13. إعمل لنفسك جو مُحاط باللغة الإنجليزية ..

مثلاً : لغة جوالك إذا كانت باللغة العربية حولها إلى الإنجليزية، حاول إنك تسمع برامج صوتية وتردد بعض الجمل يومياً !

14. حاول من وقت لأخر إنك تمسك ورقة وقلم وتبدأ تكتب أي شي خطر على بالك من كلمات ، أسماء ، جمل ، لا تخاف إنك ترتكب خطأ أو إنك تخترق قواعد اللغة !

15. إذا حبيت تطور مهارة القراءة ومستواك مبتدىء، أنصحك تبدأ بكتب الأطفال لأنه المفردات الموجودة فيها سهلة وتقدر تفهمها ببساطة وهذي الخطوة بتحفزك إنك تستمر✨!

بالنهاية أحب أقولك إذا إلتزمت واستمريت بالنصائح يلي قدمتها لك، سنة وحدة أنا أضمن لك إنها تكون كفيلة بقلب مستواك من مبتدئ الى مُتقدم وتخلي قدراتك ومهاراتك باللغة الإنجليزية عالية ??.